Fjallastígar Dólómítanna 12.09.2024

12.9.2024

Ítölsku Dólómítarnir eru heillandi útivistarparadís sem íslenskt fjallafólk verður að upplifa! Þeir bjóða ekki bara upp á frábærar skíðabrekkur fyrir veturinn heldur einnig risastórt net af göngustígum, hjólastígum, Via ferrata klifurleiðum og fjallaskálum. Þessi ferð er blanda af fallegum göngum, ógleymanlegu brölti ásamt sjarmerandi bæjarlífinu í Cortina d´Ampezzo sem er sannkallað hjarta Dólómítana. Bærinn er þekktur fyrir fallegar byggingar, góða veitingastaði, útivistarverslanir og fleira. Á hverjum degi er hópnum ekið með lúxus smárútum upp í fjöllin og göngum við einhverjar fegustu fjallastíga heims.

Ferðin verður farin 12. – 19. september 2024 og við gistum 7 nætur á góðu hóteli í miðbæ Cortina. Miðað er við að þátttakendur fljúgi með Play til Feneyja. Síðasta daginn er farið snemma til Feneyja og gefst tækifæri til að njóta þessarar einstöku borgar áður en flogið er heim seint um kvöldið.

Í þessari ferð förum við léttar Via ferrata leiðir sem eru við allra færi. Via ferrata þýðir “járnvegur” og vísar til stálvíra og stiga sem er fléttað inn í gönguleiðir til þess að ferðafólk komist leiðar sinnar með öruggum hætti. Þessar leiðir voru fyrst lagðar með skipulögðum hætti í fyrri heimsstyrjöldinni en þær eru um 600 talsins í Dólómítunum. Fyrir ferðina verður boðið upp á þjálfun í via ferrata klifri og er það innifalið í verðinu. Via ferrata klifrið er aðeins lítill hluti af hverjum degi og verður einnig í boði að sleppa klifrinu og  njóta í staðinn fegurðar fjallanna með kaffibolla á meðan farið er í klettana.

Innifalið
  • Íslensk fararstjórn
  • Akstur frá Feneyjum til Cortina
  • Akstur frá Cortina til Feneyja
  • Gisting á þriggja stjörnu hóteli með morgunverði í miðbæ Cortina (7 nætur)
  • Tveir sameiginlegir kvöldverðir í Cortina (sjá lýsingu)
  • Öll leiðsögn og akstur á göngudögum
  • Aðgangur að kláfum
  • Leiga á Via ferrata búnaði
  • Kennsla í via ferrata klifri fyrir ferð
  • Undirbúningsfundur og búnaðarlisti

Ekki innifalið:

  • Millilandaflug
  • Hádegisverðir
  • 5 kvöldverðir

Hægt er að fá gistingu í eins manns herbergi á hóteli gegn aukagjaldi (35.000). Hægt er að framlengja ferðina og eru þátttakendur þá á eigin vegum. Flug er ekki innifalið í ferðinni og sér hver og einn þátttakandi um að bóka flug en Fjallafélagið mun benda á ákveðin flug sem henta frá Íslandi.

Tryggingar

Þátttakendur sjá sjálfir um að kaupa forfalla- og ferðatryggingu. Fjallafélagið mælir með að þátttakendur kaupi sérstaka forfallatryggingu um leið og ferðin er bókuð. Mikilvægt er að ganga úr skugga um að tryggingin nái yfir kostnað við ferðina í heild sinni (ekki aðeins yfir fargjald og gistikostnað).

Bókun

Hægt er að bóka ferðina með því að smella á „Bóka ferð“ og greiða staðfestingargjald. Staðfestingargjald að upphæð kr. 45.000 er óendurkræft.

Skilmálar

Mikilvægt er að þátttakendur kynni sér skilmála Fjallafélagsins sem hægt er að hálgast hér: https://fjallafelagid.is/skilmalar/

Fararstjóri

Fararstjóri er Haraldur Örn Ólafsson

TÍMALENGD

8 dagar

TEGUND FERÐAR

Utanlandsferð

INNIFALIÐ

Sjá lýsingu

ERFIÐLEIKASTIG

VERÐ

319.000 kr.

Availability: In stock

Product price
Additional options total:
Samtals:

DAGSKRÁ

Dagur 1, fimmtudagur 12. september

Ferðin miðast við að flogið sé með Play frá Íslandi til Feneyja og er lent kl. 21:05. Ekið verður til Cortina d´Ampezzo og förum á hótelið sem gist verður á alla ferðina.

Dagur 2, föstudagur 13. september

Við tökum því aðeins rólega um morguninn enda komum við seint á hótelið kvöldið áður. Eftir góðan morgunmat á hótelinu verður okkur ekið til móts við fjöllin sem umkringja bæinn. Við tökum síðan kláf upp í 2.100 metra hæð. Til að hita okkur upp æfum við klifur tæknina á Ra Pegna leiðinni þar sem við fáum einstakt útsýni yfir Cortina og stórkostleg fjöllin í dalnum. Við höldum svo áfram og göngum Astaldi stíginn sem liggur eftir syllum sem skarta rauðum fallegum lit. Við fræðumst um merkilega jarðfræði svæðisins sem myndaðist fyrir 220 milljónum ára. Hér eru greinileg setlög sem urðu til í hitabeltisloftslagi. Áfram höldum við undir undurfögrum hlíðum Tofana fjalla og skoðum náttúrlegan helli með höfuðljósunum okkar. Fljótlega komum við á Alta via 1 leiðina og fylgjum við henni síðast spölinn. Loks er hópnum ekið á hótelið í Cortina. Kvöldverður á eigin vegum. Vegalengd 9 km. Hækkun 700 m. Lækkun 800 m.

Dagur 3, laugardagur 14. september

Skoðaðar verða söguminjar eftir fyrri heimsstyrjöldina. Við göngum upp Lagazuoi fjall en það geymir göng, loftvarnarbirgi, hella og fleira en þarna var háð um 2 ára stríð á milli Ítala annars vegar og Austurríkismanna/Ungverja hins vegar. Sögunni er komið á framfæri með varðveittum minjum frá stríðinu sem sýna glöggt þær harðneskjulegu aðstæður sem hermennirnir bjuggu við. Við göngum upp göng og stiga með hjálm og höfuðljós. Hádegisverður í Rifugio Lagazuoi skálanum sem er í hæstur allra skála í Dólómítunum, 2750 m. Síðan er gengið niður fjallið með via ferrata búnað meðferðis og í rútuna sem ekur okkur aftur til Cortina. Sameiginlegur kvöldverður í Cortina (innifalinn). Vegalengd 13 km. Hækkun 900 m. Lækkun  900 m.

Dagur 4, sunnudagur 15. september

Við byrjum göngu dagsins í Passo Giau skarðinu og höldum á Nuvolau fjall (2574 m.) sem bíður upp á stórkostlegt útsýni á þekkt fjöll eins og Cristallo, Marmolada og Tofane. Á leiðinni er auðveld via ferrata leið (La Gusela) þar sem við smellum okkur í vírinn til að tryggja öryggi. Höldum áfram niður af fjallinu og tökum matarhlé við Averau skála. Næst klífum við Averau fjall eftir skemmtilegri via ferrata leið. Næst skoðum við Cinque Torri klettana sem er eitt af þekktustu fjöllum Dólómítana. Göngum áfram niður í skóglendi og niður á veg þar sem rútan sækir okkur. Sameiginlegur kvöldverður í Cortina (innifalinn). Vegalengd 12 km. Hækkun 550 m. Lækkun 900 m.

Dagur 5, mánudagur 16. september

Í dag er frjáls dagur til að njóta lífsins lystisemda og alls þess sem Cortina hefur uppá að bjóða. Við getum ráðlagt göngu og/eða hjólaleiðir og aðstoðað við leigu á hjólum. Gott að nýta daginn í hvíld enda hörku dagur á morgun. Kvöldverður á eigin vegum.

Dagur 6, þriðjudagur 17. september

Við ökum nú til Sexten Dólómítana og heimsækjum Tre Cime þjóðgarðinn. Þar er m.a. að finna “Tindana þrjá af Laverado” (Tre Cime Laverado / Drei Zinnen) sem er klárlega frægasta kennileiti í öllum Dólómítunum. Fjöllin voru áður landamæri Austurríkis og Ungverjalands en í dag skilja þau að ítölsku héröðin Suður Týról og Belluno. Við göngum ævintýralegan hring og skoðum þetta stórbrotna umhverfi úr öllum áttum. Við klífum Paternofjall eftir via ferrata leið og verðlaunin eru magnað útsýni stórbrotin fjöll Dólómítanna. Kvöldverður á eigin vegum. Vegalengd 13 km. Hækkun 950 m. Lækkun 950 m.

Dagur 7, miðvikudagur 18. september

Þetta er síðasti fjallgöngudagurinn okkar og við höldum upp dalinn og klífum fjallið Monte Fiames eftir hinni frægu Strobel via ferrata leið. Uppgangan er ekki erfið en áhugaverð allan tímann og útsýnið er engu líkt. Niður af toppnum förum við bratta skriðu og er nauðsynlegt að hafa göngustafi. Um kvöldið fögnum við saman vel heppnaðri gönguviku með sameiginlegum kvöldverði sem er innifalinn. Vegalengd 10 km. Hækkun 950 m. Lækkun 950 m.

Dagur 8, fimmtudagur, 19. september

Við ökum um morguninn frá Cortina til Feneyja þar sem tækifæri gefst til að skoða þessa einstöku borg. Í lok dags er haldið út á flugvöllinn í Feneyjum og flogið heim til Íslands. Miðað er við að hópurinn fljúgi með Play kl. 22:05.