Dagur 1 – þriðjudagurinn 7. maí – Komudagur og ekið til Tirana
Þennan dag er komið til höfuðborgarinnar Tírana með flugi. Fararstjórar taka á móti hópnum og er í framhaldinu ekið á hótel í miðborginni þar sem gist er um nóttina.

Innifalið: Akstur frá flugvelli, og gisting á 4 stjörnu hóteli í miðborg Tirana. 

Dagur 2 – miðvikudagur 8. maí – Tirana til Berat

Vaknað ekkert allt of snemma og tími fyrir gönguferð um miðbæ Tírana og stefnum á að aka suður á bóginn fljótlega fyrir hádegið. Við stoppum við vatnasvæðið í Belsh þar fær hópurinn léttan hádegisverð og stund til að kæla sig í vatninu ef hitinn er mikill. Eftir Belsh er 40 mínútna akstur ökum við til bæjarins Bera sem er á heimsminjaskrá Unesco. Þar gistum við á fallegu hóteli sem er rétt við fornan bæjarmúrinn. Eftir að hópurinn er kominn inn á hótel er einhver tími til að rölta um bæinn og fræðast um merkilega sögu bæjarins. Um kvöldið snæðir hópurinn á frábærum veitingastað hótelsins.
Innifalið: Morgunverður, hádegisverður og kvöldverður. Akstur og gisting á 4 stjórnu hóteli. 

Dagur 3 – uppstigningardagur fimmtudaginn 9. maí – Göngudagur Mt. Tomorr

Við tökum daginn snemma og ökum áleiðis að rótum á Mt.Tomorr sem er 2,416 metrar og er hæsta fjall mið Albaníu.  Við fjallið verða aðstæður metnar um hversu löng gangan verður með tilliti til aðstæðna í fjallinu. Þetta er sögulegt fjall og í trú margra Albana er fjallið heimili guðanna rétt eins og Olympus er fjall guðanna í Grikklandi.  Í ágúst á hverju ári fara kaþólskir íbúar landsins pílagrímsgöngu á fjallið og í huga Bektashi múslíma er fjallið heilagt.
Af fjallinu er stórkostlegt útsýni í allar áttir, gróðurfar og dýralíf er einstakt á fjallinu. Gera má ráð fyrir að gangan taki um 6 tíma. Þegar hópurinn kemur til baka til Berat er tími fyrir sturtu og örstutt rölt á þekktan veitingastað á svæðinu sem heitir Cocos, þar bíða eigandinn (yfirleitt aðeins við skál), eiginkona og dóttir sem útbúa fyrir hópinn dýrindis veislukost.

Innifalið: Morgunmatur, nestisbox (hádegisverður) og kvöldverður á Cocos ásamt gistingu á 4 stjörnu hóteli. 

Dagur 4 – föstudagur 10. maí – Berat til Permet
Við þurfum ekki að vakna allt of snemma eftir langan uppstigningardag. Eftir morgunverð, ökum við eftir nýuppgerðum vegi suður á bóginn.Í hádeginu snæðum við mat á glæsilegum veitingastað við Bylis rústirnar sem eru frá 350 fyrir Krist, þar á meðal er leikhús sem tók 7500 manns í sæti. Það er nýlega búið að malbika veg að svæðinu og er því hingað til lítið heimsótt af ferðamönnum. Ef tími gefst eru skoðaðar náttúrlegar heitar laugar í Benje og geta þeir sem viljað skellt sér laugarnar. Ferðadagurinn endar í litlu þorpi sem heitir Leusa þar er fallegt gistiheimili sem hópurinn gistir í.
Innifalið: Allar máltíðir, akstur og gisting á afskekktu fallegu gistiheimili.

Dagur 5 – laugardagur 11. maí – Ganga um Zagoria fjallgarðinn

Eftir góðan morgunverð verður gengið um Zagoria fjallgarðinn sem teygir sig alla leið til Grikklands. Þetta er brött ganga sem verðlaunar þá sem leggja í gönguna með stórkostlegu útsýni yfir Vjosa dalinn. Gert er ráð fyrir að gangan taki um 6 tíma.
Um kvöldið fáum við ríkulegan kvöldverð að hætti Albana og slökun í stórkostlegri náttúru Zagora þjóðgarðsins.

Innifalið: Morgunverður, nesti í fjallgönguna og kvöldverður. Einnig fjallaleiðsögn frá heimamanni

Dagur 6 – mæðradagurinn sunnudagur 12 maí – Gjirokastra – Nivicha
Aftur er ekið af stað og áfram suður. Við heimsækjum bæinn Gjirokastra sem er líka á heimsminjaskrá Unesco. Í bænum skoðum við virki sem var byggt á Napóleon tímanum, þetta er líka fæðingarbær Enver Hoxa sem var einræðisherra Albaníu en hann hélt landinu lokuðu frá umheiminum á svipaðan hátt og Norður Kórea. Hópurinn fær leiðsögn um bæinn og fræðist um merka sögu Gjirokastra og Albaníu.

Þegar þessu er lokið ökum við á fáfarnar slóðir inn á milli fjalla sem nefnist Kurvelesh á milli fjallanna er hrikalegt Nivica gil og er eitt lengsta gil Evrópu um 40 km langt. Þetta er svæði sem fáir túristar hafa komið til enda var vegurinn illfær til 2022 þegar hann var malbikaður.
Þar munum við gista í 2 nætur í lúxus “Glamping” tjöldum sem eru uppsett undir stráþaki og er útsýnið frá tjöldunum engu líkt.  Tjöldin eru 2 manna með baðherbergi.
Innifalið: Morgunverður, kvöldverður, leiðsögn í Gjirokastra, akstur og gisting í lúxus tjöldum. 

Dagur 7 – mánudagur 13 maí – Göngudagur um Nivicha

Þessi dagur er göngudagur og við stefnum á hæsta tind fjallgarðsins sem heitir Këndrevicës 2122 metrar, enn og aftur þarf að meta aðstæður með hversu hátt við komumst en það getur verið talsverður snjór á þessum tíma. Gangan tekur um 6 – 8 tíma.
Eftir gönguna bíður okkar glæsileg kvöldmáltíð og önnur ævintýra nótt í glamping tjöldunum
Innifalið: Allar máltíðir, nesti, fjallaleiðsögn frá heimamanni og gisting í lúxus tjöldum.

Dagur 8 – þriðjudagur 14 maí – Nivica til Vlore

Eftir stórkostlega náttúruupplifun er stefnan tekin á strönd Adríahafsins. Við ökum meðfram ströndinni, stoppum á nokkrum vel völdum stöðum á leiðinni og snæðum hádegisverð í Himare.  Ekið verður yfir Llogora Pass en þaðan er útsýni yfir hafið í vestur og hálendi Albaníu í austur. Við endum aksturinn á Albönsku Rivierunni þar sem sjórinn er kristal tær. Það er dásemd að snorkla og skoða náttúruna í sjónum eða bara að slaka á á einkaströnd sem tilheyrir hótelinu sem við gistum í næstu 2 sólahringa.

Innifalið: Morgunverður og gisting á 4 stjörnu hóteli ásamt akstri.
Ekki innifalið: Hádegis og kvöldverður og afþreying á svæðinu.

Dagur 9 – miðvikudagur 15 maí – Strandlíf.
Áframhaldandi strandlíf á Rivierunni. Fyrir þá sem hafa ekki þolinmæði fyrir strandlífi er möguleiki á að fara í bátsferð og skoða Karaburun skagann sem hefur sérstakar kletta myndanir, fallegar strendur og kristalstær sjórinn glampar undir skipinu.
Innifalið: Morgunverður og gisting á 4 stjörnu hóteli.
Ekki innifalið: Hádegis og kvöldverður. Bátsferð eða afþreying á svæðinu.

Dagur 10 – fimmtudagur 16. maí – Heimferðardagur.
Stefnt er á að fljúga heim síðdegis. Frá ströndinni er ekki nema tveggja tíma akstur á flugvöllinn í Tírana og því liggur ekkert á. Hópurinn hefur því viðkomu á Uka Farm sem er vínbúgarður með frábærum veitingastað skammt frá flugvellinum.
Innifalið: Morgunmatur og hádegismatur með vínsmökkun ásamt akstri á flugvöllinn.