Kynningarfundur á Facebook-síðu Fjallafélagsins þriðjudaginn 1. mars kl. 20. Sjá nánar HÉR. 

Æfintýrahlaup er hlaupahópur þar sem fléttað saman fjallahlaupum, náttúruhlaupum og styrktar- og þolæfingum í metnaðarfullri dagskrá. Boðið er upp á þrjár æfingar í viku. Dagskráin er neðst á síðunni.

Það sem einkennir Ævintýrahlaup er:

• Lítill hópur, hámarksfjöldi er 40 manns
• Hópnum er skipt í tvennt eftir getu og eru tveir þjálfarar með hvorum hóp á æfingum og í ævintýrahlaupum.
• Áhersla á góða stemmningu í þéttum hlaupahóp
• Með litlum hóp næst fram persónulegri tenging og betri upplifun
• Markviss og persónuleg nálgun við æfingar

Ævintýrahlaup

Einn laugardag í hverjum mánuði er hlaupaviðburður sem við köllum ævintýrahlaup, en þá er farið um spennandi slóðir sem fæstir hafa hlaupið. Hefjast kl. 10. 

Æfingar

Á miðvikudögum eru hlaupaæfingar þar sem lögð er áhersla á fjölbreyttar hlaupaleiðir í nágrenni höfuðborgarinnar. Hópnum er skipt í tvennt eftir getu og eru tveir þjálfarar með hvorum hóp. Hefjast kl. 18.

Villihlaup

Þrjá laugardaga í mánuði eru hlaupaviðburðir sem við köllum villihlaup. Hópurinn hittist og hleypur saman samkvæmt leiðbeiningum. Hver hleypur á eigin forsendum og án þjálfara. Hefjast kl. 10.

Tímabil

Ævintýrahlaup er mánaðarleg áskrift að útivist og líkamsrækt. Hópurinn er starfandi allt árið en frí er í júlí og hálfan desember. Dagskráin á vormisseri er hér fyrir neðan.

Base Camp Training

Á þriðjudögum eru Base Camp æfingar í World Class Laugum kl. 6:30. Æfingakerfið er hannað fyrir útivistarfólk með það fyrir augum að komast í toppform og byggja upp grunn til að stunda útivist. Þjálfunin er einstaklingsbundin svo að hver þátttakandi nái hámarks árangri á sínum forsendum. Einblínt er á árangur en ekki ákafa og þannig er hætta á meiðslum lágmörkuð. Við leggjum áherslu á góða stemmningu og samheldni hópsins. Tímarnir fara fram í World Class Laugum á þriðjudögum klukkan 6:30. Hver tími er 50 mínútur.

Grunnstoðirnar fimm

1. Stoðkerfið – Unnið er sérstaklega með kjarnaæfingar (core) og liðir líkamans styrktir markvisst (hné, mjaðmir, bak, kviður og axlarliðir).
2. Styrkur – Unnið er með fjölbreyttar styrktaræfingar þar sem notast er við lóð, TRX bönd, bjöllur og eigin líkamsþyngd.
3. Úthald – Boðið er upp á úthaldsæfingar í tækjum; róðravélar, æfingahjól og þrekæfingar með bjöllum, kössum og á gólfi.
4. Jafnvægi og hreyfifærni – Jafnvægisæfingar eru unnar á sérstökum jafnvægisbrettum. Einnig eru fjölbreyttar útfærslur hreyfifærniæfinga á gólfi.
5. Liðleiki – Fjölbreyttum teygjuæfingum er fléttað inn í æfingakerfið og einnig er gefinn tími í teygjuæfingar í lok hvers tíma.

Æfingakerfið miðar að því að blanda saman því besta úr líkamsrækt, styrktar- og þolþjálfun, jafnvægisæfingum og teygjum.

Áskriftin

Ævintýrahlaup eru í mánaðarlegri áskrift og kostar hver mánuður kr. 19.900. Greitt er í byrjun hvers mánaðar. Engin binding er í áskriftinni og er hægt að segja henni upp fyrir hver mánaðamót. Ekki er greitt fyrir júlí og hálfan desember þegar Ævintýrahlaup fara í frí.

Innifalið

• Hlaupaviðburðir: Ævintýrahlaup, æfingar og villihlaup
• Base Camp Training æfingar

Ekki innifalið

• Aðgangur að stöðvum World Class
• Akstur og flutningur vegna ferða

Umsjón með hlaupaæfingum

Ragnar Antoniussen byrjaði að hlaupa fyrir nokkrum árum síðan og hefur alltaf hlaupið utanvega, fyrst með hópi Landvætta, síðan með Náttúruhlaupum og svo á eigin vegum.  “Eftir að hafa byrjað á utanvegahlaupunum þá sé ég að þau eru tilvalin leið til að upplifa náttúruna og til að njóta. Ég hef stundað fjallaferðir í mörg ár og byrjaði að hlaupa til að koma mér í fullkomið fjallaform. “

Bjarki Valur Bjarnason hefur stundað hlaup í einu eða öðru formi frá því seint á síðustu öld.  Hann hefur einnig stundað fjallabrölt af ýmsu tagi í gegn um árin og í seinni tíð kýs hann helst að hlaupa um ótroðnar slóðir og leggur áherslu á að njóta ferðalagsins.  Hann myndi sjálfur seint skilgreina sig sem keppnishlaupara en stendur tvímælalaust fyrir sínu.

Sigrún Hermannsdóttir fór ekki að stunda utanvegahlaup fyrr en eftir fertugt, full efasemda um eigin hlaupagetu. Efasemdirnar véku hins vegar fljótt fyrir þeirri ánægju sem hlaup í skógum, meðfram vötnum, upp um fjöll og firnindi hafa veitt og er í dag endalaust þakklát fyrir þessa nýju ferðavídd sem hlaupin hafa opnað, hérlendis og erlendis.

Gunnar Júlísson byrjaði að hlaupa fyrir 10 árum og hafði þá ekki hlaupið lengra en út í bíl. “Nokkrum bjórum síðan og ómældum gleðistundum með góðum vinum hef ég farið frá því að hlaupa milli staura í að geta hlaupið 100 mílna utanvegahlaup. Ég lít á hlaupin sem tækifæri til að ferðast og sjá staði sem ég myndi líklega ekki sjá annars, þetta hefur leitt mig í hlaup um víða veröld.”

Umsjón með Base Camp Training:

Jón Ívar Ólafsson.
“Ég heiti Jón Ívar Ólafsson, alltaf kallaður Jónsi og hef starfað sem einkaþjálfari í 24 ár, lengst af í World Class Laugum frá árinu 2004. Ég er menntaður ACE þjálfari og hef í gegnum árin þróað mitt eigið æfingakerfi sem fullkomnast í Base Camp æfingakerfinu. Gildin í þjálfun hjá mér endurspeglast í mínu eigin lífsviðhorfi þar sem jafnvægi er gott á milli æfinga inni og úti. Ég stunda sjálfur hjólreiðar, utanvegahlaup, lyftingar og fjalla- og gönguskíðamennsku. Ég legg mikið uppúr fjölbreyttri hreyfingu allan ársins hring og langar til að deila minni reynslu og þekkingu með þér.”