Skíðabandalagið 2023

Feb.-Apríl

Ferðafrelsi á skíðum

Skíðabandalag Fjallafélagsins er hópur fyrir fólk sem veit fátt skemmtilegra en að ganga á ferðaskíðum í ótroðnum snjó. Fjallafélagið býður nú aftur upp á Skíðabandalagið en það fór í margar skemmtilegar ferðir síðastliðna tvo vetur. Farnar verða fjórar dagsferðir en fimmta ferðin er púlkuferð þar sem við gistum í tjaldi í eina nótt.  Hægt er að kaupa púlkuferðina sem staka ferð en aðrar dagsferðir er ekki hægt að kaupa stakar. Skíðabandalagið er frábær undirbúningur fyrir þá sem vilja fara lengra í sportinu, bæði styttri vetrarútilegur eða lengri ferðir eins og að þvera Vatnajökul.

Ferðaskíði í stuttu máli

Ferðaskíði eru utanbrautar gönguskíði með stálköntum sem henta vel til göngu í ótroðnum snjó. Skíðin eru breiðari og þyngri en brautarskíði enda ætluð til að höndla mismunandi færi og fjölbreyttar aðstæður, s.s. heiðarlönd, fjalllendi, jökla o.sv.frv. Þetta sport opnar mikla ferðamöguleika þar sem maður er óháður troðnum brautum. Í raun þarf bara að finna snjó og þá er ævintýrið framundan!

Hvaða búnað þarf?

Í ferðum Skíðabandalagsins þarf að hafa ferðaskíði, vatnsþétta skíðaskó, stafi og hefðbundinn fatnað til vetrargöngu. Farið verður sérstaklega yfir nauðsynlegan búnað fyrir púlkuferðina.

Fyrir hverja?

Skíðabandalagið hentar þeim sem eru komnir með ákveðna grunnfærni á ferðaskíðum en fyrir þá sem eru nýir í sportinu bendum á Grunnámskeið Fjallafélagsins. Ferðirnar krefjast ekki tæknilegrar reynslu og hraðinn er stilltur af í takti við hópinn.

Skipulag og fyrirvari vegna aðstæðna

Greinargóðar upplýsingar eru sendar í tölvupósti fyrir allar ferðir. Dagsferðirnar hefjast kl. 10 og taka yfirleitt 2 til 4 klst. Fólk ferðast á eigin bílum í ferðirnar. Í einhverjum tilvikum gæti þurft að gera breytingar á dagskrá eða staðsetningu vegna snjóalaga eða veðurs. Einnig gæti þurft að færa ferðina yfir á laugardag eða að fella ferðina niður vegna veðurs eða snjóleysis.

Fararstjórar

Umsjónarmenn Skíðabandalagsins eru Haraldur Örn Ólafsson, Örvar Þór Ólafsson og Guðrún Ragna Hreinsdóttir. Öll hafa þau mikla reynslu af ferðaskíðum og hafa leiðsagt styttri og lengri ferðir s.s. Vatnajökulsferðir o.fl.

TÍMALENGD

3 mánuðir

TEGUND FERÐAR

Ferðaskíði

INNIFALIÐ

Leiðsögn

ERFIÐLEIKASTIG

VERÐ

39.500 kr.

Availability: In stock

Product price
Additional options total:
Samtals:

DAGSKRÁ

Skíðabandalagið mun fara í fjórar flottar dagsferðir og eina púlkuferð þar sem gist er í tjald í eina nótt:

5. febrúar – Sunnudagur: Marardalur frá Hellisheiðarvirkjun
19. febrúar – Sunnudagur: Þvert yfir Mosfellsheiði*
5. mars – Sunnudagur: Laugarvatnsvellir/Lyngdalsheiði
19. mars – Sunnudagur: Bláfellsháls hringur
1. – 2. apríl – Laugardagur-Sunnudagur: Púlkuferð að Fjallabaki
*rútuferð greidd sérstaklega