Klettastígar Dólómítana

17.9.2022

Draumur í Dóló

Ítölsku Dólómítarnir eru heillandi útivistarparadís sem íslenskt fjallafólk verður að upplifa! Þeir bjóða ekki bara upp á frábærar skíðabrekkur fyrir veturinn heldur einnig risastórt net af göngustígum, hjólastígum, Via ferrata klifurleiðum og fjallaskálum. Ferðin verður farin 17. – 24. september 2022 og munum við ganga skemmtilegar gönguleiðir með auðveldum og meðalerfiðum Via ferrata leiðum á svæðinu í kringum Cortina d´Ampezzo sem er sannkallað hjarta Dólómítana.

Þessi ferð er blanda af fallegum göngum, ógleymanlegu brölti og klifri ásamt lúxuslífinu í Cortina d´ Ampezzo. Örfáir Íslendingar hafa prófað Via ferrata kifurleiðir og hér er því tækifæri til að prófa eitthvað nýtt. Ferðin er einnig frábært tækifæri til að kynnast menningu Ítalíu og sögu, svo ekki sé minnst á ítalskan mat, drykk og kaffi. Við gistum á góðu hóteli í miðbæ Cortina sem er þekktur fyrir sjarmerandi byggingar, góða veitingastaði, útivistarverslanir og fleira. Dagarnir eru því skipulagðir út frá Cortina en samkvæmt heimildum eru að meðaltali 300 sólardagarnir þar á hverju ári!

Ferðin er hugsuð fyrir fólk sem er í góðu líkamlegu formi og ræður við brölt og príl í miklum bratta en klifurreynsla er ekki nauðsynleg. Via ferrata leiðir eru flokkaðar eftir erfiðleikastigi frá 1-6 og þær leiðir sem við munum fara í þessari ferð eru allar í flokki 2 eða 3.

Ferðin er skipulögð á sama tíma og Fjallastígar Dólómítana en hóparnir tveir mun ferðast saman og gista á sama hóteli í Cortina. Munurinn á ferðunum er sá að í þssari ferð eru farnar erfiðari Via ferrata leiðir sem fléttast inn í gönguleiðirnar.

Via ferrata – hvað er það?

Via ferrata þýðir “járnvegur” og vísar til stálvíra og stiga sem er fléttað inn í gönguleiðir til þess að ferðafólk komist leiðar sinnar með öruggum hætti. Þessar leiðir voru fyrst lagðar með skipulögðum hætti í fyrri heimsstyrjöldinni en þær eru um 600 talsins í Dólómítunum. Vírinn er festur í bergið með reglulegu millibili en ferðamaðurinn notar tvær karabínur, sem tengjast klifurbelti með sérstöku via ferrata “kitti”, til þess að tryggja sig í vírinn. Via ferrata leiðir eru flokkaðar eftir erfiðleikastigi frá 1-6 og þær leiðir sem við munum fara í þessari ferð eru allar í flokki 2 eða 3 og eru bæði auðveldar og meðalerfiðar.

Fyrir þá sem ekki hafa prufað Via ferrata áður er góðar líkur á að mikil spenna og gleði geri vart við sig!

Innifalið:
  • Gisting á hóteli í miðbæ Cortina (6 nætur)
  • Morgunverður á hóteli alla dagana í Cortina
  • Sameiginlegir kvöldverðir í Cortina
  • Öll leiðsögn og akstur á göngudögum
  • Ferðir með kláfum
  • Akstur á milli Munchen og Cortina báðar leiðir
  • Leiga á Via ferrata kitti
  • Undirbúningsfundur og búnaðarlisti
  • Íslensk fararstjórn
Ekki innifalið:
  • Millilandaflug
  • Einn kvöldverður og hádegisverður Cortina
  • Gisting og kvöldverður fyrir síðustu nóttina á flugvallarhóteli í Munchen
  • Leiga á fjallahjóli

Hægt er að fá gistingu í eins manns herbergi á hótelum gegn aukagjaldi. Hægt að framlengja ferðina og eru þátttakendur þá á eigin vegum. Hver og einn þátttakandi sér um að bóka millilandaflug.

Fjöldi þátttakenda:

Lágmarksfjöldi 8 – hámarksfjöldi 12.

Tryggingar:

Þátttakendur sjá sjálfir um að kaupa forfalla- og ferðatryggingu. Fjallafélagið mælir með að þátttakendur kaupi sérstaka forfallatryggingu um leið og ferðin er bókuð. Mikilvægt er að ganga úr skugga um að tryggingin nái yfir kostnað við ferðina í heild sinni (ekki aðeins yfir fargjald og gistikostnað).

Bókun:

Hægt er að bóka ferðina með því að smella á „Bóka ferð“ og greiða staðfestingargjald. Einnig er hægt að senda tölvupóst á fjallafelagid@fjallafelagid.is. Staðfestingargjald að upphæp kr. 25.000 er óendurkræft.

Skilmálar:

Mikilvægt er að þátttakendur kynni sér skilmála Fjallafélagsins sem hægt er að hálgast hér: https://fjallafelagid.is/skilmalar/

Fararstjórar:

Fararstjórar eru þær Helga María Heiðarsdóttir og Belinda Eir Engilbertsdóttir. Þær kynntust árið 2005 í Björgunarfélagi Akraness. Þær hafa ferðast og brasað mikið saman síðan þá bæði hérlendis og erlendis í alls konar útivist. Þær voru að öllum líkindum fyrstu íslensku konurnar til að fara í Via ferrata í Dólómítunum og hafa einnig  farið aðrar Via ferrata leiðir eins og t.d. á Triglav, hæsta fjall Slóveníu.

Helga María er þaulreyndur leiðsögumaður, útivistarkona og náttúruhlaupari, hún hefur leiðsagt ævintýraferðir á Íslandi og erlendis síðastliðin 14 ár. Helga María hefur ferðast víða og þekkir vel ferðamennsku á framandi slóðum.
Hún er menntaður náttúruland- og jöklafræðingur og er mjög fróð um náttúru og jarðfræði og hefur gaman af því að deila með öðrum. Hún er formaður Íslenskra Fjallaleiðsögumanna á Íslandi (AIMG) og setur metnað sinn í að tryggja öryggi og fagmennsku í leiðsögn.

Belinda er þaulreynd björgunarsveitakona með áhuga á öllu tengdu útivist. Hennar uppáhalds ferðir eru með allt á bakinu þar sem frelsið er alsráðandi. Hún hefur ferðast víða bæði hérlendis sem erlendis og vill helst alltaf vera á ferðinni, hún hefur ástríðu fyrir náttúruvernd og góðu kaffi. Hún er menntaður landslagsarkitekt og vinnur hjá Orkuveitu Reykjavíkur, þar er hún kjörin fulltrúi í öryggis og heilsunefnd fyrirtækisins og öryggið alltaf sett í fyrsta sæti fram yfir annað, má segja að öryggið sé innprentað í DNA-inu hennar.

TÍMALENGD

8 dagar

TEGUND FERÐAR

Utanlandsferð

INNIFALIÐ

Sjá lýsingu

ERFIÐLEIKASTIG

VERÐ

285.000 kr.

Out of stock

Uppselt er í ferðina / hópinn. Þú getur skráð þig á biðlista og við látum þig vita um leið og hægt er að skrá sig að nýju.

DAGSKRÁ

Dagur 1, laugardagur 17. september:

Ferðin hefst á flugvellinum í Munchen. Ekið í rútu til Cortina de Ampezzo á Ítalíu en aksturinn tekur uþb 4,5 klst. Komum okkur fyrir á hóteli í miðbæ Cortina. Sameiginlegur kvöldverður.

Dagur 2, sunnudagur 18. september:

Eftir góðan morgunverð hefjum við daginn á því að horfa upp í fjöllin en Cortina er umkringd háum Dólómískum klettum sem lætur engan ósnortin! Rúta skutlar mannskapnum í nágrenni Cinque torri þar sem ferðinni okkar er heitið í göngu og Via ferretta klifur. Cinque torri samanstendur af fimm fallegum klettamyndunum og er svæðið á heimsminjaskrá UNESCO. Staðurinn var einn af miðpunktum stríðsins í fyrri heimsstyrjöldinni en í dag eru klettarnir vinsæll viðkomustaður klettaklifrara og þar er einnig útisafn sem sýnir hvernig hermenn bjuggu. Klifur dagsins er af léttari gerðinni og útsýnið stórkostlegt, horfum við yfir klettana fimm sem mynda Cinque torri ásamt stóran hluta Dólómítana er við stöndum á toppi Averau. Sameiginlegur kvöldverður í Cortina.

Dagur 3, mánudagur 19. september:

Eftir morgunmat og um hálftíma keyrslu hefjum við göngu og Via ferreta klifur dagins um hina heimsfrægu Tre cime Lavaredo sem þýðist á íslensku sem tindarnir þrír af Lavaredo. Svæðið er einn vinsælasti viðkomustaður Dólómítana vegna fegurðar svæðins og þeirra klettamyndana sem tindarnir þrír samanstanda af. Gangan og Via ferretan verður um fallegan hrygg sem liggur austan við tindana þrjá og mun þessi dagur seint gleymast þar sem útsýnið og klifrið er af hæsta gæðaflokki! Sameiginlegur kvöldverður í Cortina.

Dagur 4, þriðjudagur 20. september:

Margir þekkja skíðasvæðið Selva enda hafa Íslendingar flykkst þangað í skíðaferðir síðustu ár, en hve margir Íslendingar hafa klifrað í Val Gardena? Líklega mjög fáir! Í dag klifrum við eina frægustu og vinsælustu Via ferrata leið Dólómítana og litlar líkur á því að okkur leiðist! Ekið til baka – sameiginlegur kvöldverður í Cortina.

Dagur 5, miðvikudagur 21. september:

Rólegur dagur þar sem við leigjum okkur fjallahjól og hjólum þægilega og fallega leið í nágrenni Cortina. Stoppum á kaffihúsi á leiðinni og njótum lífsins. Eftir að við komum aftur til Cortina er frjáls dagskrá það sem eftir lifir dags. Kvöldverður á eigin vegum í Cortina (ekki innifalinn).

Dagur 6, fimmtudagur 22. september:

Hefur þú gengið á brú sem liggur á milli tveggja kletta? Eftir þennan dag getur þú svarað þessari spurningum játandi! Við ætlum að klifra eina frægustu Via ferrata leið Dólómítana sem kallast Dibona þar sem myndin Cliffhanger var m.a. tekin upp en brúin er þar sprengd upp og Sylvester Stallone rétt bjargast. Hörku göngu- og klifurdagur með góðri hækkun og lækkun sem skilur engan eftir ósnortinn. Ekið til baka – sameiginlegur kvöldverður í Cortina.

Dagur 7, föstudagur 23. september:

Síðasti dagurinn í Dólómítunum runninn upp. Við skoðum sögufrægar herminjar frá fyrri heimsstyrjöldinni ásamt því að klifra stutta Via ferrata er kallast Col de Bos, skemmtileg og vel tryggð leið upp fallegan klettavegg. Eftir gönguna ökum við til baka til Cortina. Eftir síðbúinn hádegisverð hefst heimferðin þar sem við ökum í rútu til Munchen. Komum okkur fyrir á flugvallarhóteli sem býður upp á kvöldverðarhlaðborð.

Dagur 8, laugardagur, 24. september:

Eftir morgunverð er haldið út á flugvöll og flogið heim til Íslands.

SKRÁNING Í PRUFUTÍMA

Við bjóðum upp á frían prufutíma fyrir áhugasama. Fylltu út formið hér fyrir neðan og haft verður samband við þig varðandi næsta lausa tíma.