Dagsferð um ævintýraheim undir Mýrdalsjökli

Krefjandi en heillandi dagsferð þar sem gengið er um stórbrotna náttúru undir suðaustanverðum Mýrdalsjökli.  Þátttakendur í þessari dagsgöngu upplifa andstæður sem eiga sér varla hliðstæðu á Íslandi. Gengið er upp Höfðabrekkuafrétt úr Þakgili. Á Rjúpnagilsbrúnum birtist magnað sjónarspil þar sem Mýrdalsjökull brotnar fram af brúnunum og spýtir einhverjum hæstu fossum Íslands út úr lóðréttu klettastálinu. Gengið niður brattar brekkur í faðm Huldufjalla þar sem við komumst í návígi við náttúruöflin sem eru þarna á fleygiferð. Gengið um úfinn Kötlujökul og síðan aftur upp á Höfðabrekkuafréttinn og til baka yfir í Þakgil.

Lengd ferðar

Gangan er um 21 km löng með 1.200 metra hækkun/lækkun og tekur um 10 klst. Gangan er því nokkuð krefjandi og fara þarf upp og niður brattar brekkur og ganga á ósléttum skriðjökli á jöklabroddum. Ekki er farið fram á sérstaka reynslu af fjallaferðum eða notkun jöklabúnaðar en þátttakendur þurfa að vera tilbúnir í langan dag.

Praktísk atriði

• Gangan hefst og endar í Þakgili.
• Þátttakendur skipuleggja ferðir og gistingu á eigin vegum. Í Þakgili er gott tjaldstæði og gisting í smýhýsum. Einnig hægt að gista í nágrenninu, t.d. Vík.
• Mæting í Þakgil kl. 8:30 að morgni brottfarardags. Stuttur fundur og afhending á jöklabúnaði. Gangan hefst stundvíslega kl. 9:00.
• Akstur frá Reykjavík í Þakgil tekur um 3 til 3,5 klst. Frá Vík í Þakgil um 1 klst.
• Símasamband er takmarkað í Þakgili.
• Vegurinn í Þakgil er fólksbílafær

Innifalið

Leiðsögn

Bókanir/fjöldi

Smelltu á “Bóka ferð” til þess að ganga frá greiðslu með korti. Fjöldi í ferð: lágmark 12 / hámark 24 farþegar.

Helsti búnaður

• Millistífir eða stífir gönguskór með grófum sóla
• 35-45 lítra bakpoki með festingum fyrir stafi/ísöxi
• Göngustafir
• Ísexi og jöklabroddar
• Einangrunarúlpa, húfa og vettlingar og skelfatnaður
• Gott nesti fyrir lengri dag og uþb 1,5 lítri af vatni/drykkjum

Breytingar

Fjallafélagið áskilur sér rétt til þess að fresta göngu um einn dag ef veðurspá er afgerandi betri næsta dag. Slík tilkynning er send á þátttakendur með 48 klst. fyrirvara.

Fararstjórar

Fararstjórar eru útivistarhjónin Örvar Þór Ólafsson og Guðrún Árdís Össurardóttir. Þau hafa mikla reynslu af fjallamennsku og leiðsögn innanlands sem utan.