Fjallastígar Mont Blanc

14.8.2021

Í þessari ferð göngum við uppáhalds fjallastígana okkar á Mont Blanc hringnum (Tour du Mont Blanc eða TMB). TMB er ein vinsælasta gönguleið Alpanna og ekki að ástæðulausu. Hún býður upp á einstaka náttúrufegurð og óviðjafnanlegt útsýni. Grænir dalir, fjallaskörð, jöklar og glæsilegir tindar er meðal þess sem ber fyrir augu. Þessi ferð er fullkomin fyrir þá sem vilja upplifa allt það besta á TMB en fara styttri dagleiðir með áherslu á að njóta franskrar og ítalskrar menningar í mat og drykk. Gist verður á hótelum í Chamonix og Courmayeur fyrir utan eina nótt þar sem gist er í hinum rómaða Rifugio Bonatti fjallaskála sem þykir sá flottasti á TMB.

Ferðin verður farin 14. – 21. ágúst 2021. Gönguleiðirnar eru krefjandi en samt við allra hæfi.

Innifalið:
  • Undirbúningsfundur
  • Rútuferðir, frá Genf til Chamonix og til baka
  • Rútuferðir og strætó til og frá gönguleiðum
  • Gisting í 7 nætur,  6 á hóteli m.v. tvo í herbergi og ein í fjallaskála
  • 7 morgunverðir
  • 1 kvöldverður í fjallaskálum
  • Kláfur frá Courmayeur upp í Pt. Helbronner, yfir til Aguille du Midi  og niður til Chamonix
  • Íslensk fararstjórn

Hægt er að fá gistingu í eins manns herbergi á hótelum gegn aukagjaldi.
Hægt að framlengja ferðina og eru þátttakendur þá á eigin vegum.
Flug er ekki innifalið í ferðinni og sér hver og einn þátttakandi um að bóka flug til Genf og til baka.

Hámarksfjöldi:

12

Undirbúningur:

Þessi ferð er nokkuð krefjandi en þó við allra hæfi. Til að gera ferðina ánægjulegri hvetjum við þátttakendur til að þjálfa sig vel fyrir ferðina.

Búnaður:

Búnaðarlisti verður sendur til þátttakenda.

Tryggingar:

Þátttakendur sjá sjálfir um að kaupa forfalla- og ferðatryggingu auk leitar- og björgunartryggingu.

Fararstjórar:

Guðrún Harpa Bjarnadóttir og Kolbrún Björnsdóttir.

Bókun:

Hægt er að bóka ferðina með því að senda tölvupóst á fjallafelagid@fjallafelagid.is. Staðfestingargjald er kr. 30.000,-. Verði ferðinni aflýst vegna covid eða af öðrum ástæðum er staðfestingargjaldið endurgreitt að fullu.

TÍMALENGD

8 dagar

TEGUND FERÐAR

Utanlandsferð

INNIFALIÐ

Sjá lýsingu

ERFIÐLEIKASTIG

ALMENNT VERÐ

320.000

FJALLAFÉLAGAR

320.000 kr.

Out of stock

DAGSKRÁ

Dagur 1, laugardagur 14. ágúst:

Flogið til Genfar í Sviss þar sem við lendum um kl. 13:00 og ökum í rúma klukkustund til franska bæjarins Chamonix sem
er einn stór dótakassi fyrir fjallafólk. Frjáls tími það sem eftir er dags.

Dagur 2, sunnudagur 15. ágúst:

Göngum frá Tré-le-Champ í botni Chamonix dalsins upp að Lac Blanc sem er jökullón í um 2.350 metra hæð en í góðu skyggni er engu líkt að sjá Mt. Blanc fjallgarðinn speglast í lóninu. Göngum síðan niður að La Flegere fjallaskálanum þaðan sem við tökum kláf tilbaka niður í Chamonix.
Vegalengd 10 km. Hækkun 1.000 m. Lækkun 500 m.

Dagur 3, mánudagur 16. ágúst:

Tökum kláf upp í Col de Brevent sem er í um 2.500 mtr. hæð og beint á móti sjálfum Mt. Blanc tindinum þannig að það er nánast eins og maður sé með hann í fanginu. Njótum þess að skoða útsýnið áður en við leggjum í göngu dagsins sem liggur alla leið niður í Chamonix eða sem nemur um 1.500 metra lækkun.
Vegalengd 12 km. Hækkun 200 m. Lækkun 1.500 m.

Dagur 4, þriðjudagur 17. ágúst:

Förum í rútu í gegnum Mt. Blanc göngin yfir til Ítalíu og hefjum gönguna efst í Val Veny dalnum. Göngum meðfram fjallshlíð þar sem útsýnið er stórfenglegt á suðurhlið Mont Blanc, tindana í kring, skriðjökla, jökulruðninga o.fl. Ógleymanlegur dagur. Endum á hóteli í Courmayeur.
Vegalengd 12 km. Hækkun 460 m. Lækkun 1200 m.

Dagur 5, miðvikudagur 18. ágúst:

Gengið frá Courmayeur til fjallaskálans Rifugio Bonatti, sem er einn sá flottasti á TMB hringnum og  býður upp á dásemdar mat og snyrtilegan svefnskála. Áframhaldandi stórfenglegt útsýni yfir á suðurhlið Mt. Blanc.
Vegalengd 14 km. Hækkun 860 m. Lækkun 700 m.

Dagur 6, fimmtudagur 19. ágúst:

Göngum niður úr Bonatti skálanum ofan í Val Ferret dalinn og tökum strætó til baka til Courmayeur og hvílum það sem eftir er dags. Í bænum er gaman að skoða safn sem er tileinkað fjallaleiðsögumönnum Alpanna, njóta ítalska matarins og fegurðar  bæjarins og ekki síst að slaka vel á og anda að sér ítölsku fjallamenningunni.
Vegalengd 2 km. Hækkun 0 m. Lækkun 400 m.

Dagur 7, föstudagur 20. ágúst:

Þennan dag förum við til baka til Chamonix en ekki sömu leið og komum heldur förum við með kláfum yfir sjálfan Mont Blanc fjallgarðinn og komumst þannig í beina snertingu við fjallið hvíta. Tökum kláf upp í Pt. Helbronner í 3462 mtr hæð, þar sem við færum okkur yfir í litla gondola vagna sem ferja okkur yfir hvíta dalinn – Vallee Blanche. Úr vögnunum horfum við niður á völundarhús af stórum sprungum, með fjallarisana til beggja handa; Dent du Géant, Mt. Blanc du Tacul og auðvitað sjálfan Mt. Blanc. Endum í Aguille du Midi kláfstöðinni í 3.842 mtr hæð þaðan sem við tökum þriðja kláfinn niður til Chamonix eftir að hafa andað að okkur þunna loftinu og dáðst að útsýninu í síðasta sinn.

Dagur 8, laugardagur, 21. ágúst:

Heimferð. Flogið frá Genf.

MYNDIR

GERAST FJALLAFÉLAGI