Þátttakendur í Fjallgönguáskoruninni fengu frábært útsýni af Akrafjalli laugardaginn 15. febrúar síðastliðinn. Glampandi sól og loftið kristaltært. Norðaustanáttin var á sínum stað eins og síðustu vikuna og var frostið um 3-4 stig.
Gengið var á Geirmundartind sem 643 metra hár en þá fylgir göngufólkið fjallsbrúninni upp allan norðurhygg fjallsins þar til maður stendur á þessum hæsta tind fjallsins. Útsýnið til norðurs var stórkostlegt, Snæfellsnes, Borgarfjörður, Hafnarfjall, Skarðsheiði og fleira. Í suðri/austri sáu glöggir menn í Heklu, Kálfstinda og fleiri fjöll. Höfuðborgin og allt Reykjanesið á sínum stað.
Hópnum var skipt þannig að einn minni hópur gekk hratt en stærri hópur gekk á "venjulegum" hraða. Frábær dagur á fjöllum. Myndir eru inni á myndasíðum.
